بعد أن صحى الرئيس من ذلك الكابوس الذي أصابه بالإحباط ذهب إلى مكتبه حتى ينسى ما تسبب به الكابوس من غثيان و خوف و قلق و إحباط له و عند دخوله إلى مكتبه وجد تناهي تزقر " أي تشرب زقارة " و كنعان يقهويها " أي يصب لها قهوة " و كان وجه الرئيس عابسا فأطفأت تناهي الزقارة بفنجان القهوة الذي كان يحمله كنعان و توجهت إلى الرئيس ....
تناهي : شفيك طال عمرك , ليش متضايق ؟
الرئيس : حلمت بكابوس ضيق خلقي , ما أدري ألقاها من منو ولا من منو ؟
تناهي : هذا كابوس طال عمرك يعني مو مهم خلاص إنتهى
الرئيس : أدري أنه كابوس بس انا متضايق و مو قادر أنساه
كنعان : طال عمرك أنا أخليك تنساه الحين , اليوم الصبح شفت سيارة بالبراحة اللي جدام بيتنا , حدها كلاسيكية و شكلها روعة
الرئيس : من صجك , و ليش ما شريتها
كنعان : هذي تطوفني طال عمرك , شريتها و باجر نحولها بإسم معرض السيارات الكلاسيكية الخاص بمكتبك و نستلمها
الرئيس : أبي أشوفها الحين ما أقدر أنطر لباجر
كنعان : بس طال عمرك السيارة بالبراحة , شلون تروح تشوفها
الرئيس : مابي مابي , ابي اروح اشوفها والله ترى ما اروح اجتماع مجلس الإدارة اليوم
كنعان : طال عمرك احنا نروح الإجتماع و بعد ما نخلص الإجتماع نمر تشوف السيارة
الرئيس : لا ماني رايح الإجتماع لين أشوف السيارة , مو أنا الرئيس خلاص بكيفي
تناهي : خلاص طال عمرك أنت روح الإجتماع مع كنعان و أنا ادز واحد من الموظفين يصور لك السيارة و تشوف السيارة و إنت بالإجتماع
الرئيس : قلت لكم ماني رايح لين أشوف السيارة على الهواء مباشرة
كنعان : الرئيس قفلها , خلاص طال عمرك خلنا نروح نشوفها و بعدين نروح الإجتماع
الرئيس : يالله وناسه بشوف سيارتي الكلاسيكية اليديدة
و ذهب الرئيس و كنعان لرؤية السيارة و كان الرئيس طوال الطريق إلى البراحة يفكر في شكل السيارة و بأي لون سوف يصبغها و وصلا إلى البراحة و كانت الثواني تمر على الرئيس كأنها ساعات إنتظار مولود
الرئيس : وين السيارة ؟
كنعان : كانت هنيه قبل شوي , يمكن صاحبها اخذها عشان يغسلها في محطة الحميدي
الرئيس : شلون يوديها ؟ مو دفعنا الفلوس إحنا , ليش يحركها من مكانها
كنعان : طال عمرك , يمكن لما عرف أن انت اللي بتشتريها قال ينظفها و يغسلها لك
الرئيس : مالي شغل , ابي السيارة الحين
كنعان : خلني أكلم راعي السيارة عشان اشوف وينه
كنعان : ألو
صاحب السيارة : هلا
كنعان : انا اللي شريت منك السيارة الكلاسيكية
صاحب السيارة : وينك انت , السيارة سحبتها البلدية من خمس دقايق
كنعان : وديتها المغسلة , خلاص عيل باجر على موعدنا
صاحب السيارة : أي مغسلة , اقول لك البلدية سحبتها
كنعان : خلاص موعدنا باجر
الرئيس : ليش باجر , ابي اشوفها الحين خلنا نروح المحطة
كنعان : طال عمرك تبي الصج البلدية سحبت السيارة
الرئيس : مو بكيفهم , انا رئيس مجلس إدارة شلون يسحبون سيارتي
كنعان : كاهو كاهو طال عمرك
الرئيس : شنو ؟
كنعان : كاهو موظف البلدية يسحب سيارتك الكلاسيكية
انتهى الجزء الثالث و نلتقي في الجزء الرابع
